Illa meðferð dýra
Þrátt fyrir að flestir gæludýraeigendur eru til fyrirmyndar hvað varðar meðferð á dýrum þá eru alltaf skemmd epli inn á milli.
Allir sem verða þess varir að verið sé að fara illa með dýr ber skylda til þess að tilkynna það til viðkomandi yfirvalda.
Reglulega fær Dýrahjálp fyrirspurn frá áhyggjufullum aðilum sem telja að verið sé að fara illa með dýr og eru að leita að upplýsingum um það hvert skal leita. Það virðist vera að það sé ekki ljóst hvert skal tilkynna slíkt svo við höfum farið á stúfana og kannað hvernig þessu ferli er háttað hjá yfirvöldum.
Ábyrgðaraðilar dýraverndarmálum
Eftirlit með dýraverndarmálum fellur annars vegar undir Umhverfisstofnun og hins vegar Matvælastofnun eftir því hvort um sé að ræða gæludýr eða búfé . Umhverfisráðherra fer með yfirstjórn mála varðandi dýravernd gæludýra og Umhverfisstofnun hefur svo eftirlit með framkvæmd laga og reglugerða í umboði ráðherra.
Landbúnaðarráðherra fer með yfirumsjón mála varðandi dýravernd búfjár og Matvælastofnun hefur svo eftirlit með framkvæmd laga og reglugerða í umboði ráðherra.
Umhverfisstofnun og héraðsdýralæknar (Matvælastofnun) vinna saman við að framfylgja þeim lögum og reglugerðum sem tengjast þessum málaflokki.
Hvað skal gera ef þú verður var við illa meðferð á dýrum?
Ef þú verður var við illa meðferð á dýrum ber þér skylda til þess að tilkynna það til viðkomandi yfirvalda.
1. Ef um er að ræða gæludýr þá þarft þú fyrst að meta það hvort að það þurfi að senda eftirlitsaðila á staðinn innan mjög skamms tíma (til dæmis ef um er að ræða ástand sem ógnar lífi dýrsins) eða hvort að dagur eða tveir mega líða þar til eftirlitsaðilar koma á staðinn. Ef þú telur að það þurfi að kanna aðstæður strax þá hefur þú samband við lögreglu sem fer á staðinn og metur ástandið. Ef dagur eða tveir mega líða þá hefur þú samband við Umhverfisstofnun sem senda héraðsdýralækni til að kanna aðstæður eins fljótt og auðið er og meta hvað þarf að gera til þess að viðkomandi aðili framfylgi þeim lögum og reglugerðum sem þeim er gert að fylgja varðandi dýravernd.
2. Ef um búfé er að ræða þá hefur þú beint samband við héraðsdýralækni sem heyrir undir Matvælastofnun sem fer á staðinn eins fljótt og auðið er.
Frekari upplýsingar
Ef áhugi er á að kanna frekar framkvæmd vegna slíkra mála þá má finna verklagsreglur yfirdýralæknis og Umhverfisstofnunar á heimasíðu Umhverfisstofnunar varðandi viðbrögð þeirra við grun um illa meðferð dýra.
Viðeigandi lög
- Lög um dýravernd (1994 nr. 15 16. mars)
- Lög um innflutning dýra (1990 nr. 54 16. maí)
- Reglugerð um aðbúnað og umhirðu gæludýra og dýrahald í atvinnuskyni (1077/2004)
- Almenn hegningarlög (1940 nr. 19 12. febrúar)
Dýraverndarsamband Íslands - www.dyravernd.is
Dýraverndarsamband Íslands er byggt á grundvelli fyrsta dýraverndarfélags sem stofnað var hér á landi árið 1914. Það er sameiginlegur vettvangur þeirra sem vilja stuðla að velferð dýra, villtra og taminna, búfjár og gæludýra. Það leggur áherslu á miðlun upplýsinga og fræðslu en lætur sig reyndar varða allt það sem snertir bætta meðferð dýra og velferð þeirra. Dýraverndarsamband Íslands eru frjáls og óháð samtök (NGO). Dýraverndarsambandið á fulltrúa í Dýraverndarráði, er aðili að Norræna dýraverndarráðinu (Nordisk Dyrebeskyttelsesråd) og að Heimssambandi til verndunar dýrum (World Society for the Protection of Animals (WSPA)). Sambandið er einnig aðili að Landvernd. Dýraverndarsamband Íslands vill stuðla að upplýstum umræðum á Íslandi um velferð dýra og eru allar ábendingar og upplýsingar mjög vel þegnar. Einstökum málum verður sinnt eftir föngum svo sem tími og aðstæður leyfa.
Dýraverndarráð - www.ust.is
Dýraverndarráð starfar samkvæmt 17. gr. laga nr. 15/1994 um dýravernd. Hlutverk dýraverndarráðs er að vera umhverfisráðherra og umhverfisstofnun til ráðgjafar um dýraverndarmál. Um stefnumótandi mál, svo sem setningu reglugerða, skal leita umsagnar dýraverndarráðs. Í Dýraverndarráði sitja fjórir menn, tilnefndir af Bændasamtökum Íslands, Hinu íslenska náttúrufræðifélagi, Dýralæknafélagi Íslands og Sambandi dýraverndunarfélaga á Íslandi. Fulltrúar ráðsins eru: Sigurborg Daðadóttir, formaður, tilnefnd af Dýralæknafélagi Íslands. María Björk Sigurðardóttir, tilnefnd af Hinu íslenska náttúrufræðifélagi. Ólafur R. Dýrmundsson, tilnefndur af Bændasamtökum Íslands og Linda Karen Gunnarsdóttir, tilnefnd af Dýraverndarsambandi Íslands. Umhverfisstofnun leggur ráðiinu til ritara. Hægt er að senda tölvupóst á Dýraverndarráð á netfangið: dyravernd@ust.is
Sum dýr þurfa nauðsynlega að finna heimili með skömmum fyrirvara og því getur reynst nauðsynlegt að koma því fyrir á fósturheimili þar til finnst varanleg lausn fyrir dýrið.
Með því að gerast meðlimur þá gengur þú í lið með okkur og segir að þörf sé á dýraathvarfi á Íslandi sem geti tekið við þeim dýrum sem þarfnast nýs heimilis.
Atburðahópur stendur fyrir kynningaratburðum til að kynna þar sem við getum komist að, t.d. flóamarkaður, jólaþorpið, hundasýningar þar sem við myndum að öllum líkindum hafa einhver af þeim dýrum með sem eru að leita að heimilum.
Dýrahjálp Íslands tekur alltaf við gjöfum frá einstaklingum og fyrirtækjum í formi dýradóts eða fóðurs sem verður nýtt fyrir fósturdýrin okkar.
Ath. Því betri upplýsingar sem við höfum, því auðveldara er að finna gott heimili fyrir gæludýrin.
Smelltu hér til að skrá tilkynningu um týnt dýr.
Fannstu dýr á flakki? Smelltu hér til að skrá tilkynningu.
